Vide a ver a nosa terrorífica exposición de vasoiras!

 

Próxima celebración: O Día das Bibliotecas Escolares (24 de outubro de 2025)

 

 O lema deste ano, "Contra a desinformación: bibliotecas", pretende destacar o papel fundamental que desempeñan todas as tipoloxías de bibliotecas (públicas, escolares, universitarias, especializadas e nacionais/rexionais) na loita contra a desinformación.

As bibliotecas combaten a desinformación non só a través dos seus recursos, como as coleccións de libros e prensa ou as bases de datos, senón tamén a través dun uso adecuado das novas tecnoloxías. E, por encima de todo, as bibliotecas son un dique de contención contra a desinformación grazas ao seu persoal bibliotecario, que traballa como curador de contidos e apoio aos usuarios na procura de información a través de fontes fiables e contrastadas. 

 

As bibliotecas escolares galegas amosáronse, e continúan facéndoo, como unha ferramenta ao servizo da comunidade educativa ofrecendo recursos, información e apoio,  lugares que contribúen á formación dunha cidadanía crítica, activa e comprometida. O seu traballo de deseño e planificación de actividades e servizos desenvólvese cunha perspectiva de Axenda 2030 poñendo o foco en que ninguén das nosas comunidades educativas debe quedar atrás.

 

A biblioteca escolar, esa biblioteca pola que pasan todas as nenas e todos os nenos do país, a primeira biblioteca que lles aprende, tamén, a usar outras, que os pon en contacto con eses outros espazos do coñecemento e do lecer, eses lugares nos que pasan moitas cousas, que son as bibliotecas públicas, eses lugares que están sempre ao noso carón: as BIBLIOTECAS.  

 

DÍA DAS ESCRITORAS (13 de outubro de 2025)

 Nesta semana do 13 ao 17 de outubro, traballamos na biblioteca o Día das escritoras. Falamos e pensamos sobre dita celebración. Aprendimos o que é un díptico, no que viña un poema da escritora Dora Vázquez, unha das autoras homenaxeadas. Falamos do poema, dos versos, das rimas, do xeito de lelo e do seu significado, e mesmo o leron todos á vez. Un pracer ler xuntos!

Esta conmemoración estaba centrada nas escritoras de 1975 co lema de: Escribide, compañeiras!

 

   

   

 

 

XORNADAS DE FORMACIÓN DE USUARIOS DA BIBLIOTECA (alumnado de primaria)

 Aquí van algunas fotos das distintas actividades feitas co alumnado de primaria en canto á formación de usuarios, na que aprenderon aspectos sobre o empréstito e a devolución dos fondos; as partes dun libro; a organización dunha biblioteca segundo a CDU (Clasificación Decimal Universal); xogos para colocar os libros por orde alfabética... Xa son uns expertos!